حب جيلاتيني!!!

- معلش يا (حيِّزَر) يا أخويا.. أنت عارف مليش غيرك..

- هتوديني في داهية أنت يا (محدود)...

- معلش هم تلت دقايق بس... أصلها وحشاني أوي يا (حيِّزَر)...

- أنت تقعد تحب يا أخويا واحنا نقف في عز البرد...

- معلش بقى الأصحاب لبعضيهم...

- ماشي أما نشوف أخرتها، وهاخد كام على العملية دي؟

- عشر أنياب كويس؟!

أومأ (حيِّزَر) برأسه، ثم سارا معاً تجاه كهف عتيق...

وعند البوابة تلفتا حولهما قليلاً، ثم اتجه (محدود) في سرعة ليصعد، وقبل أن يعبر أول درجة في السلم التفت إلى (حيِّزَر) وقال:

- متنساش كلمة السر: رش الميه على الخشخاش، وانشر نفسك كالخفاش...

أومأ (حيِّزَر) برأسه في ثقة، فصعد (محدود) متوجساً...

***

وصل (محدود) إلى الدور المنشود، وقف أمام باب الكهف الوحيد فيه، عدل من هندامه، ثم... طق.. طق طق.. طق.. طق طق....

على الفور أطل من خلف الباب وجه شاحب، كانت (براكسا) محبوبته، تأمل عينيها الناعستين، والأشياء القذرة التي تغطيهما، وقال بابتسامة حانية:

- أنتي لسه صاحية من النوم؟!

- أيوه يا حبيبي...

- بتبقي شبه الشياطين يا حبيبتي حتى وأنتي صاحية من النوم...

ابتسمت (براكسا) في حياء، واصفرت وجنتاها علامة الخجل، فابتسم (محدود) وقال:

- أنا عارف إن أبوكي (نابوري) مش هنا، وأنتي وحشتيني قلت لازم أجي أشوفك...

ضحكت (براكسا) وقالت في دلال:

- يا مجنون.. كل ده عشاني؟

على الفور أخرج (محدود) من جيبه شيئاً جيلاتينياً وهو يقول:

- مش بس كده... جايبلك معايا أمعاء بشري عشان ناكلها سوا...

ثم وضع الشيء الجيلاتيني في فمه، وهو يشير إليها، ابتسمت وقالت:

- بجد ده أكتر حاجة رومانسية حد عملهالي في حياتي...

ثم قربت فمها من فمه كي تشاركه قطعة الجيلاتين، وحين اقتربت شفاهه من شفتيها وخفق قلبه انفعالاً؛ سمعا جلبة بالأسفل ثم تعالى صوت (حيِّزَر) يصرخ:

- فشش فشاااااااش... كرفش كرفااااااااش!!!!

***

ولكن لمَ صرخ (حيِّزَر)؟!!!

لنعود إلى دقائق مضت.....

***

وقف (حيِّزَر) حانقاً بعدما صعد (محدود)، أخذ يهز قدميه في عصبية، ثم أشعل سيجارة بعد معاناة، الجو عاصف، والهواء يحول دون إشعاله لعود الكبريت سيء الصنع، بالكاد استطاع أن يشعل السيجارة، ثم استنشق من دخانها نفحة كبيرة متخيلاً أن ذلك يمنحه بعض الدفء في ذلك الزمهرير، ضم ياقتي معطفه وتمتم في ضيق:

- يقطع الأصحاب على المذئوبين على الحب وسنينه السودة في يوم واحد!!

ثم أخرج الدخان ونفخ في يده واستطرد:

- ما أنا أهو! اجوزت من غير حب ولا عبط من ده.. قال حب قال... وكل يوم يروح يقطفلها جيلاتيناية.. هأو!!

مشى قليلاً حول الكهف، وحين وصل إلى بابه من جديد لمح مستذئب عجوز يقترب في سرعة، التفت إليه ليجده (نابوري) والد (براكسا)....

(نابوري) ينظر في ساعته ليجد منتصف الليل اقترب فيقول في غضب مستعر:

- بتعمل إيه هنا ياض أنت؟!

(حيِّزَر) يبتلع ريقه في توتر ولا يرد، ويحاول أن يتذكر كلمة السر في سرعة كي يصرخ بها وقد ألجمته المفاجأة، لكن (نابوري) لا يمهله ويمسك بتلابيبه ويقول:

- مش أنت صاحب المتنيل على عينه اللي عايز يخطب البت (براكسا)؟! أيوه أنت.. أنا فاكرك كويس.. شكلك محرمتش من العلقة اللي فاتت...

ثم يضم قبضته أمام وجه (حيِّزَر) ويصرخ:

- اوعى يكون صاحبك الـ (... حذفته الرقابة ... ) بيحوم هنا...

أخذ (حيِّزَر) يحاول تذكر كلمة السر اللعينة دون جدوى، ظلت تحلق في عقله مبهمة غامضة، لكن قبضة (نابوري) العاتية حين ارتطمت بوجهه جعلته يتذكر ويصرخ:

- فشش فشاااااااااش... كرفش كرفاااااااش!!!

نظر له (نابوري) بعينين حمراوين وصرخ:

- وكمان بتشتم يا ( ... حذفته الرقابة ... ) يا ابن الــ ( ... حذفته الرقابة ... ).. طب وحياة أمك ما أنا سايبك...

فزع (حيِّزَر) وقال في لهجة حاول أن يجعلها قوية:

- متجبش سيرة أمي...

- هتعمل فيها راجل يا ابن الـ ( ... حذفته الرقابة ... )

وعلى الفور، اتجهت قبضته لتحطم أنف (حيِّزَر) المسكين، ثم توالت المطارق فوق باقي وجهه، حتى تهشم تهشيماً وفي ثورة صرخ فيه (نابوري):

- انطق بتعمل هنا إيه؟!

- أنــ... أنا... مستـ... مستني... (محدود)....

اتسعت عينا (نابوري) غضباً فوق غضب وقال:

- يعني الـ (... حذفته الرقابة ... ) التاني هنا.. طب قدامي يا ابن الـ ( ... حذفته الرقابة ... )....

واتجها إلى السلم ليصعدا.....

***

بعدما سمع (محدود) صراخ (حيِّزَر) أخذ يضحك ساخراً، ويقول:

- بيقول إيه العبيط ده؟!!

ضحكت (براكسا) وقالت:

- هو اللي بيصرخ ده صاحبك؟!

- آه.. جبته معايا عشان لو أبوكي جه ينده عليا عشان أهرب...

ثم نظر لها نظرة ذات معنى وقال:

- كنا بنقول إيه؟!

ضحكت ضحكة مائعة وقالت:

- مكناش بنقول حاجة...

اقترب منها ليقبلها واقتربت منه وهى تقول في دلال:

- مش لما نجوز الأول؟!!

هم بالرد عليها وهو يقترب من شفتيها لكن صوت (نابوري) العجوز اخترق أذانهما وهو يصرخ:

- وليه هتستنوا كل ده؟! لا بوسوا بوسوا حرام تستنوا لما تتجوزوا برضه...

صرخت (براكسا) وقالت:

- مليش دعوة والله يا بابا، هو اللي غواني وجابلي جيلاتين بطعم الأمعاء البشرية...

- كمان جيلاتين!! وأمعاء بشرية!! نهار أبوك أسود...

- بالهداوة بس يا عمي، احنا لسه معملناش حاجة غلط...

- وأنا هستنى لما تعملوا يا ( ... حذفته الرقابة ... ) وحياة أمك لناتفلك شعرك شعرة شعرة إنت وصاحبك ده...

غمغم (حيِّزَر) وهو بالكاد يستطيع الاحتفاظ بوعيه:

- يحرق صاحبه على اليوم اللي عرفه فيه...

وكانت معركة من طرف واحد....

***

في المستشفى...

جلس الاثنان أمام مومياء تضمد جراحهما...

(محدود): - أدي أخرة اللي يعتمد عليك...

(حيِّزَر) : - أنا قعدت أصرخ بكلمة السر أنت اللي عملتلي فيها عادل إمام ولازم تبوس...

(محدود): - هو اللي أنت قلته ده كلمة سر أصلاً؟! أنا قلت أنت بتحزق في حمام!!

(حيِّزَر) : - يعني دي أخرتها يا واطي...

(محدود): - يا عم اتنيل...

(حيِّزَر) : - خلاصة الكلام أنا عايز العشر أنياب بتوعي...

(محدود): - عشر إيه؟!! هي هي هي...

(حيِّزَر) : - بقى هتنصب عليا يا ( ... حذفته الرقابة ... ) يا ابن الـ ( ... حذفته الرقابة بنت الـ (... حذفه المؤلف بعد ما مسك نفسه وامتنع عن سب الرقابة اللي شغالة حذف حذف!! )... )

ثم قام (حيِّزَر) متجاهلاً المومياء التي تضمد جراحه، وصرخ في (محدود):

- مش البوليس لحقنا قبل ما هو ينتفلك بقية شعرك.. أنا بقى هنتفهولك شعرة شعرة...

ثم ضحك في سخرية وبدأ يجذب شعيرات (محدود) الذي أخذ يصرخ في ألم، ويتمتم لنفسه مواسياً إياها:

- لو كان الشعر عزيز... لو كان الشعر عزيز... لو كان الشعر عزيز...............

18 يوليو 2009

إبادة مسلمي الإيجور

http://www.moheet.com/show_files.aspx?fid=279672

أتعشم أن تكونوا قرأتم ما في اللينك السابق، أقسم أننا أوغاد لا نستحق الحياة من الأساس، أقسم على ذلك ألف مرة، ملايين المسلمين يبادون حول العالم كل يوم، ونحن نشاهد، نتأمل، والأدهى نبتسم، والمصيبة نضحك!!!

غداً سنباد، وسيقفون أيضاً يبتسمون ويضحكون ونحن نُذبح وحرماتنا تستباح، ساعتها سنصرخ بهم، نستغيث، ببلاهة سيقولون:

واحنا في ايدينا ايه غير الدعاء؟!

ردوا عليهم ساعتها وأخبروهم ما الذي عليهم فعله، والله هيجي علينا الدور وقريب اوي، وكله هيقف يتفرج علينا مش هنلاقي حد يندد علينا حتى، بس مش فالحين غير في التفاهة، كلنا أوغاد، أنا مش عارف هنقول لربنا إيه يوم القيامة، حتى المقاطعة مش قادرين نعملها، حتى الصلاة بنصليها بالعافية، هنوري وشنا للرسول إزاي، لما يروحوا يقولوله أبادونا يا رسول الله وكانوا واقفين يتفرجوا... هنقله إيه؟! هنقوله إيه؟! حد يقلي كده هنقله إيه؟!

عن نفسي مش هقدر أرفع عيني في عين أي واحد فيهم، كل اللي هقدر أعمله إني هعيط وأقولهم سامحوني.. سامحوني.. أرجوكم سامحوني..

بس يا ترى هيسامحوا؟!!

هتقولولي واحنا في ايدينا ايه، في ايدينا كتير، في ايدينا نتقن عملنا، في ايدينا نبقى قوة، في ايدينا نبعد عن الحشيش والمخدرات، في ايدينا نبعد عن الوساخة، في ايدينا ننضف، في ايدينا نتقدم، في ايدينا نطور، في ايدينا كل حاجة، احنا اللي مش عايزين، احنا اللي بنرمي أخطاءنا على شماعة غيرنا...

في ايدينا نبقى دولة يهابها العالم لما تقول لا دول مسلمين ومننا يبقى كلمتها تحترم، في ايدينا حاجات كتير، في ايدينا نبني زي ما بنهدم، في ايدينا نكسب بالحلال زي ما بناخد رشوة، في ايدينا نقول كلمة طيبة بدل ما بنشتم، في ايدينا ندعي ليهم ساعة زي ما بنتفرج على الماتشات، في ايدينا نقول لأ.. في ايدينا نقول لأ.. في ايدينا نقول لأ... ويمكن......

يمكن حد يسمعنا........

مقهى... وأشياءٌ اخرى!!!

دخل (مطحون) ذلك المقهى وهو يجمع أطرافه المتساقطة محاولاً أن يحتفظ بها كلها، جرَّ قدميه حتى وصل إلى صديقه (محدود الدم)، الجالس يرشف في بطء من كوب ملئ بسائل أحمر أمامه..

تبادلا التحية ثم جلس (مطحون) وأشار إلى الساقي فجاء رجل يرتدي مريلة سوداء وقال:

- تطلب إيه حضرتك؟

فكر (مطحون) قليلاً ثم نظر إلى (محدود الدم) وسأله قائلاً:

- هى كوباية الدم الطازة بكام دلوقتي؟

- بنابين ونص..

- يا ليل أبيض!! ده أنا معيش غير ربع ناب..

مط (محدود الدم) شفتيه فبرزت أنيابه المتآكلة، ثم تململ الساقي في ضيق وتنهد وهو يقول:

- انجز ورايا زباين كتير...

- عندك حاجة بربع ناب؟

ابتسم الساقي ساخراً وقال:

- ممكن أجيبلك لبانة بطعم اللحمة النية وخلاص..

- يبقى كتر شرك..

انصرف الساقي محنقاً وهو يغمغم:

- أنا عارف إيه اللي بيحدف علينا البلاوي دي؟! أنا قلت للمعلم ميت مرة يعلق ورقة يكتب عليها: "ممنوع دخول الزومبي".. بس هو مبيسمعش كلامي..

***

جلس (محدود الدم) يقرأ جريدة (جانب النجوم اليوم)، وأخذ يمصمص بشفتيه متذمراً مرة، ومتعجباً أخرى، فنظر له (مطحون) وقال:

- في حاجة جديدة؟

- اسمع يا سيدي.. بيقولك (السحرة) عملوا اعتصام إمبارح قدام صومعة (السحر)، وكالعادة قوات (فلاد الولاشي) فضت الليلة، وقال إيه: (لوسيفر) طالع يقلك دول قلة مندسة...

ضحك الاثنان ثم قال (محدود الدم):

- لا واسمع دي.. بكره في تغيير في الصوامع، أكيد هيغير المغضوب عليهم، بس تراهن على إزازة دم مشبرة مش هيغير (فلاد الولاشي) أبداً..

- أكيد تكسب.. ده هو أساساً اللي مخليه عارف يسيطر، بس سمعت إنه هيغير رئيس المصاصين؟

- آه باين.. بيقولك هيجيب مصاص دماء كان بيدرس في أرض الظلام..

ساد الصمت قليلاً إلا من صوت رشفات (محدود) من كوب الدم أمامه، قبل أن يقول (مطحون):

- ما تطلبنا ورق تاروت نلعبلنا دور كده ولا حاجة..

طوى (محدود) الجريدة وحطها جانباً، ثم نادى على الساقي..

- معندكش ورق تاروت؟

هز الساقي رأسه أن لا...

- طب معندكش دومنه شيطاني؟

- عندي.. بس بخمسين زلوط..

أومأ (محدود) برأسه فذهب الرجل ليحضرها – الدومينو لا رأسه بالطبع – وقبل أن ينطق (مطحون) سمعا صوت صديقهما الثالث (حيِّزَر) الساحر..

ألقى عليهما السلام، ثم جلس جوارها وقال:

- ازيكوا يا ملاعين يا ولاد الملاعين؟

(محــدود): - ازيك أنت يا (حيِّزَر)؟

(مطحون): - من ساعة ما نقلت سكنك لجهنم الحمرا وأنت معنتش بتسأل..

(حيِّـــزَر): - معلش يا ملاعين.. أنتم عارفين بقى الواحد مشغول..

(محــدود): - اللي علي علي يا عم..

قاطعهم مجيء الساقي حاملاً الدومينو فنظر له (حيِّزَر) متأففاً وانتظر حتى وضع ما يحمله ثم قال له:

- هاتلي واحد شيشة عظام بس توصى بالفحم..

أومأ الساقي له وابتعد فغمغم (حيِّزَر):

- يا ما نفسي قنبلة نخاع تنزل على كل البشر دول تحرقهم..

هز صديقيه كتفيهما كأن الأمر لا يعنيهما واستطرد هو:

- قريتوا جرايد النهارده؟

أومأ (محدود) برأسه وقال:

- أنتم مش ناويين تبطلوا اعتصامات بقى؟

- مش قبل ما ناخد حقنا.. ده إحنا دمنا بيتصفى في الشغل وأعلى مرتب للواحد فينا تلتمية ناب وشوية زلاليط!!

تدخل (مطحون) قائلاً:

- أهو أحسن مني يا عم.. ده أنتم تعضوا رقابيكم وش وضهر.. ده أنا بالعافية عارف شكل الناب..

ابتسم (محدود الدم) له مشفقاً ثم استدار لــ(حيِّزَر) وقال في لهفة:

- صحيح يا (حيِّزَر) متعرفش هيعملولنا إيه في الكادر؟

- مش عارف يا (محدود) يا أخويا.. بس أدينا منتظرين تغيير الصوامع الجديد يمكن يبقى في حاجة جديدة..

- يا عم بلا نيلة.. وحياة تعابين رأس ميدوسا لو مخدنا الكادر ده لأكون رامي نفسي في نهر سقر العظيم..

ضحك (حيِّزَر) ثم قال:

- اركبلك عبَّاره أسهل..

ضحكوا جميعاً، ثم فتح (مطحون) الدومينو وبدأ في فردها، ثم تناول سبع قطع وفعل (محدود) المثل، ونظرا لـ(حيِّزَر) فقال:

- لا أنتم عارفين مليش في الدومنة الشيطاني..

ابتسما وبدآ يلعبا، وجاء الساقي بالشيشة ووضعها أمام (حيِّزَر) الذي تناول مبسمها وأخذ يستنشق الدخان مستمتعاً..

كانت هناك جموع في الداخل، يلتفون أمام بلورة زرقاء تلمع فيها صورة بالأسود والأحمر، لرجل يلقي خطاباً، تعالى الصياح الغاضب قبل أن تتغير صورة الرجل لتظهر صورة لمدبح كرة، فهلل الحضور وجلسوا وكأن على رؤوسهم الخفافيش..

تعالى الصوت الخارج من البلورة يقول:

- والكورة مع (فرام) بصاها لــ(الأعور) في نص المدبح، رقص الأول.. والتاني.. وهوبااااا يااااااه جت في العارضة...

تفاعل الجلوس مع الصياح، مما أثار ضيق (حيِّزَر) فقال:

- هو هيصة هنا وهيصة في البيت وهيصة في الشغل.. يعني الواحد يروح فين بس؟!

ابتسم (مطحون) وقال:

- يا عم حد طايل يبقى عنده بيت..

قهقه (حيِّزَر) وقال:

- احسدونا بقى يا زومبي..

ضحك (محدود الدم) وقال:

- تعرف يا واد يا (حيِّزَر) أنا في بت جارتنا عندي استعداد أطعن نفسي بخنجر فضة بس أجوزها..

- مش للدرجة دي يا عم.. هى حلوة؟

- أحلى من النداهة ذات نفسها..

- يخرب أنيابك.. طب إيه اللي مانعك؟

- ما أنت عارف اللي فيها.. الواحد جيبه مخروم.. والزلاليط بتنزل منه زي الشلال..

ضحك (حيِّزَر) وقال في ثقة:

- أنا هخلصلك الموضوع ده..

تعالى صياح تلك الجموع ثم خمد وتعالى الصوت الخارج من البلورة يقول:

- ياااااااااه على الكورة اللي فاتت... جون مستحق للشياطين الحمر بس مشعل الراية حسبها تسلل.....

***

بعد أسبوع...

خرج (محدود الدم) من بيته متألقاً، مرتدياً بذلة حمراء أظهرت شعره البني الكثيف، والتمعت أنيابه بابتسامة ذئبية خالصة وهو يصافح (حيِّزَر) الذي قال له:

- إيه الحلاوة دي؟ ده الذئاب هيبتدوا يغيروا منك..

ضحكا ثم أشار (حيِّزَر) لكلبٍ ذي ثلاث رؤوس، أخبر سائقه بالعنوان فأشار لهما أن يركبا..

ما إن وصلا حتى أخرج (حيِّزَر) من محفظته نابين أعطاهما للسائق الذي نظر فيهما متأففاً ثم ألقى سبة، وانطلق لا يلوي على شيء..

سمع (حيِّزَر) السبة فرفع يده مهدداً لكن الكلب قد اختفي، فسار قليلاً مع (محدود) الذي لا يعي شيئاً ثم قال له:

- مش معقول هتخش على العروسة بأيديك فاضية...

ابتسم (محدود) ابتسامة خجلى، ثم أخرج جيبي البذلة فارغين، فقال (حيِّزَر) لائماً:

- عيب يا مستذئب.. إحنا أصحاب...

نظر له (محدود الدم) بامتنان ثم دخلا إلى ذلك المحل، فاشتريا كيلوين من اللحم النيئ واتجها إلى بيت العروسة سريعاً..

وقفا أمام باب الكهف، وأخذ (حيِّزَر) يضع اللمسات الأخيرة لصاحبه، قبل أن يطرقا الباب في أدب..

انفتح الباب عن وجه مستذئب صغير، فابتسم له (حيِّزَر) وقال:

- بابا موجود يا حبيبي؟

أغلق الصغير الباب في وجهه كأنما يصفعه، فابتلع ريقه ونظر إلى صديقه، الذي بادله النظر متوتراً، مرة أخرى انفتح الباب، لكن عن وجه مستذئب عجوز يصرخ:

- يا ابن البشري عيب كده..

ثم نظر إلى الصديقين وقال:

- اتفضلوا اتفضلوا..

دخل الاثنان، ووضع (حيِّزَر) اللحم على منضدة قريبة، ثم جاء المستذئب العجوز – واسمه (نابوري) بالمناسبة – وأشار لهما بالجلوس وقال:

- أهلاً أهلاً.. شرفتونا.. ده احنا لو نعرف كنا جبنا لترين دم..

(حيِّزَر): - ألف شكر يا عمي.. احنا جايين على سيرتك الشريرة وسامعين عنك كل شر..

(نابوري) في تواضع: - ده بس من ذوقكم يا بني.. ربنا يجعلنا من عبيده الملعونين..

(حيِّزَر): - أكيد يا عمي.. طبعاً حضرتك عارف إن الحب ملوش كبير، وإن حتى مصاصين الدماء بيجي عليهم اليوم اللي بينطسوا فيه في نظرهم ويجوزوا.. وعلى رأي المثل: الحب في القلب.. زي عضة الكلب.. ويا بخت من وفق ملعونين في الجحيم.. ولا إيه يا عمي؟

(نابوري): - عين العقل يا بني.. متشرفناش باسمك؟

(حيِّــزَر): - حيِّزَر ابن آكل الكيزر.. ساحر..

(نابوري): - ما شاء الله.. ساحر مرة واحدة.. وعندك شقة بقى على كده؟

(حيِّــزَر): - طبعاً يا عمي.. بس إيه دخل ده في موضوعنا؟

(نابوري): - أنت مش جاي تخطب البت (براكسا)؟

(حيِّــزَر): - آه بس مش ليا..

(نابوري): - أمال لمين؟!

(حيِّــزَر): - لصاحبي.. (محدود الدم)..

نظر (نابوري) لـ(محدود) ثم قال:

- إيه ده؟! ده مستذئب!!

- آه يا عمي..

- أنا ميجوزش بنتي أقل من مصاص دماء..

- ليه يعني؟! بنت (لوسيفر) يا خي..

- بتتريق يا عديم الأنياب.. وحياة شعر عيني لمعلمك الأدب..

ثم زأر وانقض عليهما...

***

بعد يومين...

صعد (مطحون) سلالم تلك المستشفى ثم طرق باب غرفة ما، ودخل ليجد صديقيه مربوطين بالحبال، ومومياء تعطي حقنة لأحدهما، تبين فيما بعد أنه (حيِّزَر)..

جلس جوارهما وقال:

- إيه اللي حصل؟

غمغم (حيِّزَر) من خلف الأربطة:

- رحنا نخطب لسي (محدود).. الراجل ضربنا..

ضحك (مطحون) ثم قال:

- يلا معلش تعيشوا وتاخدوا غيرها..

ثم مال نحوه وهمس:

- ألاقيش معاك نابين سلف؟

هز (حيِّزَر) رأسه أن لا، فابتسم (مطحون) ساخراً، ومد يده من تحت الأربطة إلى جيب (حيِّزَر) ليخرج منه محفظته ويفتحها فيجد بها عشرين ناباً وزلوطين..

ثم قال:

- ألف شكر يا أبو الحزازير...

وانصرف..

أخذ (حيِّزَر) يبكي ويردد بلا كلل:

- حد يهش الدبانة دي من على رجلي.. عايز أهرش رجلي.. عايز أهرش رجلي...

في 1 مايو 2009

أولى حلقات جانب النجوم التي كتبتها وأعتقد أن الوقت حان لتروها .. يا رب تكون عجبتكم.. وانتظروا جزءها الثاني بإذن الله....