عيد ميلاد (لوسيفر)!!

إنه الخامس من شهر (مايرو)، تعم الاحتفالات كافة أرجاء (جانب النجوم)، ولمَ لا وهو عيد ميلاد (لوسيفر) الألف؟!

تحرك (حيِّزَر) الساحر في حذر، مرتدياً قبعته الطويلة ورداءه الأسود الفضفاض، تلفت حوله في حذر، تأكد أنه لا أحد يراه، ثم طرق على باب الكهف الذي أمامه.. طق.. طق طق.. طق طق طق..

انفتح الكهف عن وجه ساحر أخر، عيناه ذكيتان وإن كانت تحيط بهما التجاعيد، أشار لـ(حيِّزَر) أن يدخل، ففعل، ثم تنهد في عمق وقال:

- زي كل سنة.. (فلاد الولاشي) عايز يلمنا كلنا ويحطنا في سجن أزكابان.. قال يعني دي هديته لللي ما يتسمى في عيد ميلاده..

أغلق الساحر العجوز الباب في سرعة، وابتسم لـ(حيِّزَر) وهو يشير له نحو حجرة جانبية، دخل (حيِّزَر) فوجد السحرة جميعاً مجتمعين فابتسم ابتسامة واسعة والتفت إلى العجوز وقال:

- كده يا (ساروين) متقوليش إن الشلة كلها هتبقى هنا..

ثم حياهم وجلس وسطهم...

(ساروين): - بصوا يا جماعة.. أنا خلاص كبرت ومعتش قادر أحمل شعلة الكفاح أكتر من كده.. لازم دلوقتي نختار نائب ليا.. وفرصة إن عيد ميلاد اللي ما يتسمى يكون يوم تتويج النائب..

(سارومان): - عظيم يا (ساروين) عين العقل..

(ساروين): - طيب مين يرشح نفسه؟!

رفع الجميع أيديهم فابتسم (حيِّزَر) متهكماً وقال:

- واضح إنك هتختار بنفسك يا (ساروين)..

(ساروين) في ضيق: - خلاص حيث كده أنا هختار اتنين وهنعمل استفتاء... (سارومان).. و(حيِّزَر)...

(حيِّزَر) بابتسامة واسعة يلتفت إلى الجالس جواره ويقول:

- انتخبني وهجيبلك بشري يخدمك.. قلت إيه؟!!

***

بعد ساعتين..

(ساروين): - وبكده يكون عندنا خمستاشر صوت لـ(سارومان)، وصوت واحد لـ(حيِّزَر).. رغم إن عدد اللي قاعدين قدامي
يعدي عدد شعر المستذبين!!

(سارومان): - مليش فيه.. أنا خلاص بقيت النائب..

(حيِّزَر) في غل: - مبروك عليك يا عم..

ثم مال على الجالس جواره واستطرد:

- بالنسبة للبشري.. انسى...

وقبل أن يتحدث الجالس جواره قام قائلاً:

- ما حد يفتحلنا البلورة نشوف الأخبار..

قام أحدهم بالفعل ليفتح البلورة الزرقاء الموجودة في أخر الكهف، وظهر فيها صورة رجل يرتدي السواد، حتى عينيه

سوداوين وعلى صدره قلادة ذهبية لامعة.. كان هذا (لوسيفر) يلقي خطبته السنوية في يوم ميلاده:

- أبنائي في جانب النجوم.. إني بكم أسعد ولكم قلبي يطرب.. وإني أعتز بثقتكم بي وأعدكم أني لن أجعل واحداً فيكم يموت مشنوقاً أو موقوذاً أو مذبوحاً دون علمي!!...

صفق الجالسين أمامه وهللوا فقال (ساورين) في غضب:

- سمعتم قال إيه؟ لا ومصاصين الدماء فرحانين وبيصقفوله كمان..

ثم استدار لـ(سارومان) وقال:

- جت فرصتك يا نائب.. يلا أخرج للثورة..

نظر (سارومان) له ببلاهة وقال:

- ثورة إيه يا عم؟!

- ثورة على (لوسيفر) في يوم عيد ميلاده..

- معلش مش هينفع انهارده أصلي عندي إسهال والدكتور قالي متاكلش موز ولا تعمل ثورات...

ثم تسلل خارج الكهف على الفور..

(ساروين): - اللعنة.. وأنا اللي كنت فاكره ساحر بحق وحقيقي ويُعتمد عليه.. طلع البشر أحسن منه..

والتفت لـ(حيِّزَر) قائلاً:

- فرصتك يا (حيِّزَر)...

والتمعت عينا (حيِّزَر) في نشوة...

***

(حيِّزَر): - واحد.. اتنين.. تلاتة... تسعة.. عشرة.. إيه ده؟! عشرة بس اللي هيقوموا بالثورة؟!

(ساروين) ينظر للكهف الفارغ ويقول: - أنتم قدها وقدود..

ثم أشار لهم بالخروج وقال: - لو حد فيكم اتمسك وقال علىَّ وحياة (لوسيفر) نفسه لمخليه يندم على اليوم اللي فكر يلمس فيه بلورة ويبقى ساحر!!

ابتلعوا لعابهم في توتر وخرجوا في سرعة متدثرين بالظلام، ومتجهين نحو قصر (لوسيفر) الجمهوري في ميدان (شياطين)..

وحين وصلوا، اختبئوا خلف شجرة كبيرة بعيدة نسبياً عن القصر، فقال لهم (حيِّزَر): - طبعاً كل واحد عارف مهمته..

نظروا لبعضهم البعض وقال أحدهم: - لأ!!

(حيِّزَر): - تمام نظبط ساعتنا بقى..

سأله أحدهم:

- هى الساعة معاك كام؟

- ستين حريقة؟ وكل حريقة ستين شعلة؟ إنت متعرفش الكلام ده ولا إيه؟

نظروا إلى بعضهم من جديد في بلاهة قبل أن يقول (حيِّزَر):

- هنهجم عند الإشارة..

- بس احنا معناش سلاح!!

- هو ده المطلوب.. عشان لما نتمسك محدش يفتح بقه معانا..

ثم نظر في ساعته وقال:

- واحد.. اتنين....

في نفس اللحظة ارتفع صوت انفجارات ولمعت السماء بالصواريخ الضوئية التي تُطلق احتفالاً بعيد ميلاد (لوسيفر)..

على الفور هرب السحرة العشرة وبقى (حيِّزَر) وحده يضرب جبهته بيده، وهو يردد:

- إيه اللي بعد (اتنين)؟! إيه اللي بعد (اتنين)؟! إيه اللي بعد (اتنين)؟!.......

4 مايرو.. إحم أقصد مايو 2009